Visa xalqaro plastik kartasini qanday ochish kerak, bu kartadan foydalanishning siz bilmagan sirlari

Assalomu aleykum uzinterbiz.com blogining mehmonlari va obunachilari! Bugun siz bilan birga, Visa xalqaro kartasi haqida gaplashamiz. Ushbu karta chet elga ko’p sayohat qiluvchilar va internet orqali mahsulot sotib oluvchilarga yaxshi tanish.

Hozirgi kunda internet-do’konlar kundan-kunga ko’payib bormoqda. Ularda ko’rsatilgan mahsulotlarni sotib olishni istaysiz-u, ammo xalqaro kartangiz yo’qmi? U holda bu maqola siz uchun. Bugun visa karta ochish, uni ishlatish tartibi va boshqalar bilan tanishtiraman.

Mavzuyimizga chuqurlashishdan oldin, Visa kartasi nima uchun kerakligini aytib o’tsam.

Visa karta — bu butun dunyo bo'ylab qabul qilinadigan to’lov instrumenti, jumladan, bankomatlar, haqiqiy va virtual do'konlar, shuningdek, pochta va telefon orqali tovarlar va xizmatlarni taklif qiluvchi do'konlarda qabul qilinadigan, VISA logotipiga ega, universal to'lov vositasi.

Karta, barcha afzalliklardan foydalanish imkoniyatini beradi. U dunyodagi eng qulay va arzon karta mahsulotlaridan biridir. VISA kartasi elektron terminallar yoki imprinterlar o'rnatilgan savdo-xizmat ko'rsatish korxonalarida to'lov vositasi sifatida qabul qilinadi. Karta yordamida siz internet orqali hisob-kitoblarni amalga oshirishingiz mumkin.

Ma’lumot uchun! VISA karta egalariga xizmat ko'rsatishning eng yirik jahon tarmog'i 18 milliondan ortiq savdo va xizmat ko'rsatish korxonalarini o'z ichiga oladi, bularga: do'konlar, restoranlar, mehmonxonalar, aviakompaniyalar, 21000 bank va butun dunyo bo'ylab 1 milliondan ortiq bankomatlar kiradi. 

O’zbekiston banklarida taklif qilinadigan Visa xalqaro plastik kartalarining turlari

Agar, bankga borib xalqaro plastik karta ochmoqchi bo’lsangiz, bank hodimi sizga, Visa kartasining turini tanlashni taklif qiladi. Kartalarning turiga qarab, ulardan foydalanish tartibi va funksiyasi ham o’zgaradi.

O’zbekistonda Visa xalqaro kartasining uchta turi bor, bular:

• Viza Elektron
• Viza Classic
• Viza Gold

Viza Electron— har qanday operatsiya karta ma'lumotlarni elektron tekshirish, uning amal qilish muddati va karta hisob mablag'I yetarliligi tasdiqlangandan  keyin amalga oshiriladi. Shuning uchun ham Visa Electron eng xavfsiz va eng mashhur karta hisoblanadi.

Viza Classic -Visa logotipi mavjud bo'lgan deyarli barcha nuqtalarda to'lov uchun qabul qilinadi. Uning yordami bilan siz internet yoki telefon orqali xaridlar uchun to'lovlarni amalga oshirishingiz mumkin. Undan elektron va mexanik to'lov terminallari va bankomatlarda ham foydalanish mumkin. Karta yordamida mehmonxona xonalari, aviachiptalar va boshqa tovarlarni band (bron) qilish mumkin.

Viza Gold— ushbu karta egalariga, Visa Electron va Visa Classic egalariga qaraganda yuqori darajada xizmat ko'rsatiladi. Ko'pgina do'konlar va restoranlar Visa Gold egalari uchun muayyan imtiyozlarni ham taklif qilishadi.

Diqqat! Xalqaro plastik kartani ochish yoki tiklash, faqat O'zbekistonda, bankga, yo'qotish yoki blok qilinganlik to’g’risida ariza topshirilgandan so'ng  amalga oshiriladi. Ariza faqat karta egasi tomonidan yoziladi va belgilangan tartibda ko'rib chiqiladi. Qarindoshlari yoki yaqinlaridan  ariza qabul qilinmaydi. Ushbu choralar mablag’ni himoya qilish uchun ko’riladi.

O'zbekistonda Viza xalqaro plastik kartasini ochish shartlari

   Hozirgi vaqtda xalqaro to'lov kartalari (konversion kartalar) bilan faqat chet elda foydalanish mumkin. Hech qanday cheklovlarsiz bankomatlardan naqd pulni yechib olish, do'konlarda, mehmonxonalarda karta orqali to’lovni amalga oshirish mumkin. To'lov kartalaridan istalgan mamlakatda foydalanish mumkin. Mamlakatlar bo'yicha cheklovlar va naqd xorijiy valyutani yechish uchun cheklashlar mavjud emas.

•             Bundan tashqari, kartalardan O'zbekistondagi bankdan, tasdiqlovchi hujjatlar (invoys) asosida, to'g'ridan-to'g'ri davolash va o'qitish uchun pul o’tkazish mumkin.
•        Respublika hududida xalqaro to'lov kartasidan (konversion karta) mablag'lar faqat joriy valyuta kursi bo'yicha milliy valyutada yoki chet el valyutasida yechib olinishi mumkin.
•             O'zbekistonda faqat debet kartasini ochish mumkin, ya'ni undan foydalanish uchun avval bank hisob raqamiga mablag' ajratish kerak.

Fuqarolar tijorat banklarining (Orient Finance Bank, Aloqa Bank, Turon Bank, Agrobank, Asaka bank, Hamkorbank, Kapital Bank va boshqalar) konversion bo'limlarida, naqd pulsiz shaklda chet el valyutasini xalqaro to'lov kartasiga (konversion kartaga) o'tkazish yo'li bilan ochishlari mumkin. Milliy valyutadagi to'lovlar, naqd va naqd pulsiz shaklda kartalar yordamida amalga oshirilishi mumkin.

      Diqqat! Hozirgi kunda banklar orasida raqobatchilik oshib borayotganligi tufayli, karta ochayotganingizda sizga har xil bonuslar taklif qilishlari mumkin. Shuning uchun albatta banklarning rasmiy saytlariga tashrif buyurib ma’lumot olishni unutmang, chunki, tartibda o’zgarishlar va yangiliklar bo’lishi mumkin!

Shu bilan birga, xalqaro kartani ochish va undan foydalanish uchun bankka komissiya to'lash kerak bo'ladi:

• kartani ochishning narxi -75 000 dan 100 000 so'mgacha (bir martalik to'lov);
• kartadan foydalangan holda to'lovlarni amalga oshirishda komissiyalar-har bir tranzaksiya summasining 0,5% dan 1% gacha;
• chet eldagi bankomatlarda naqd xorijiy valyutani yechib olingani uchun-operatsiya summasining 1%

Fuqarolar tomonidan, chet el valyutasida to'ldiriladigan xalqaro to'lov kartalari, mamlakat hududida foydalanish bo'yicha cheklovlarga ega emas.

Sug'urta depoziti va uning bank tomonidan qo'llanilishi

Sug’urta depoziti, karta egasining bankdagi shaxsiy hisobida saqlanadi. Depozit, kartadagi mablag’ tugagandan so’ng, bank tomonidan ishlatiladi.

Deposit — pul mablag'lari tugashi, valyuta kursining o'zgarishi yoki karta bo'yicha operatsiyalarni amalga oshirish uchun bank komissiyasidan foydalanganlik natijasida yuzaga kelishi mumkin.

Mijozning talabiga binoan bank unga karta orqali amalga oshirilgan barcha to'lovlar haqida batafsil ma'lumot beradi va unda qancha mablag’ sug'urta depozitidan, qanchasi karta hisobidan olinganini ko'rishingiz mumkin.

Ma’lumot uchun! Xalqaro to'lov tizimlari operatorlarining (VISA, MasterCard va boshqalar) talablariga muvofiq, banklar tomonidan 35 dollardan 100 dollargacha bo'lgan, chegirib tashlanmaydigan balans (sug'urta depoziti) o'rnatilgan bo'lib, u to'lov kartasi yopilgandan keyin mijozga qaytarib beriladi.

Kartani ishlatishda ehtiyot choralar

Visa kartasi sizning bankdagi shaxsiy hisobingizga kirish vositasidir. Shuning uchun uni ishlatishda quyidagi, asosiy ehtiyot choralariga rioya qilish kerak:

• Hech kimga kartangizni bermang va PIN kodini aytmang, PIN kodingizni va karta raqamingizni uchinchi tomonlardan sir saqlashga harakat qiling. PIN-kodni kartadan alohida saqlashni tavsiya etamiz va hech qachon uni kartaga yozmang. Kartani yo'qotish yoki o'g'irlash holatlarida, sizning kartangizdan foydalanish uchun barcha ma'lumotlarga ega bo'ladi;
• Har oyda, bankda karta bayonotlarini tekshiring. Bayonotlarni, bankga tashrif buyurganingizda olishingiz mumkin (kelajakda onlayn tarzda olishingiz mumkin bo’ladi). Shubhali yoki noma'lum tranzaksiyalar aniqlangan taqdirda, tergovni boshlash uchun darhol bankga xabar bering;
• Kartani o'g'irlash yoki yo'qotish holatlarida, bank sizning kartangizni muzlatib qo'yishi uchun darhol bankga xabar bering;
• Karta yordamida to'lovni amalga oshirayotganda kartani ko'zdan yo'qotmang. To'lovni amalga oshirganingizdan so'ng, kartangiz sizga qaytarib berilganligiga ishonch hosil qiling.
• Bankomatlardan foydalanishda, pin kodni terayotganingizda, hech kim sizni kuzatmayotganiga va sizning orqangizda turmayotganligiga ishonch hosil qiling.

Ushbu ehtiyot choralariga rioya qiling va o’z mablag'laringizning xavfsizligini ta'minlang!

Internetda, kartalardan qanday foydalanish kerak? 

Internet saytlarda to’lovni amalga oshirishdan oldin, sayt egalarining faoliyati to’g’risida, bankdan yoki saytdan foydalangan tanishlaringizdan ma’lumot olishga harakat qiling.

Sotib olmoqchi bo'lgan tovarlar ro'yxatini aniqlaganingizdan so'ng, to'lov usuli sifatida Visa kartasini tanlang. To'lovni amalga oshirish uchun karta raqamini (16 raqam), uning amal qilish muddatini, kartangizda ko'rsatilganidek, ismingizni va kartaning orqa tarafida ko’rsatilgan CVV2 kodini (3 ta raqam) ko'rsatishingiz kerak.

Kiritilgan ma'lumotlarning to'g'riligini tekshirib, tegishli tugmani bosish orqali ularni tasdiqlang. Internet-sayt to'lovni tasdiqlash uchun so'rovni yaratadi va agar siz to'g'ri ma'lumotlarni ko'rsatgan bo'lsangiz, saytda tegishli xabarni ko'rasiz.

Xulosa

Ko’rib turganingizdek xalqaro plastik karta – aslida, ko'pchilik tomonidan ishlatiladigan plastik kartadan unchalik farq qilmaydi, faqat ma'lum bir xorijiy valyutaga o'tkazilgan mablag’ni saqlaydi.

Agar, chet el safariga otlanayotgan bo’lsangiz, albatta, shunday karta ochishingizni maslahat berardim. Chunki, aynan xalqaro karta sizga dunyoning istalgan nuqtasida o’zingizni huddi uydagidek his qilishingizga imkon beradi. Internetdan noyob xaridlar qilishni orzu qilayotgan do’stlarimiz uchun ham, huddi shu maslahat!

Maqola bo’yicha savollar tug'ilsa, izohlarda qoldiring, albatta javob beraman. Bu ma’lumotlar bilan, ijtimoiy tarmoqlardagi do'stlaringiz bilan ham bo'lishing, zora ularga ham foydangiz tegib qolsa. V albatta, blog yangiliklariga obuna bo’ling!

E’tiboringiz uchun rahmat!