Web dizaynerlik kasbi qanday kasb va u nima ish bilan shug’ullanadi?

Assalomu aleykum, uzinterbiz.com blogining hurmatli o’quvchilari va mehmonlari. Bugungi kunda talab eng yuqori bo’lgan yana bir internet kasblardan biri, web-dizayner kasbi haqida sizga malumot bermoqchiman. Maqoladan, web-dizayner kim va u nima ish bilan shug’ullanadi, bu kasbning kamchilik va afzalliklari, xususiyatlari va shu kabi boshqa savollarga javob topishingiz mumkin. Maqola, maxsus badiiy yoki texnik ma’lumoti bo’lmagan, web-dizayn sohasida kodlash nima ekanligini bilmaydigan va ish tajribasi yo’q o’quvchilarga mo’ljallangan.

Bitta maqola bilan, web-dizayner bo’lish uchun zarur ko’nikmalar, vositalar va texnologiyalar haqida to’liq aytib berish qiyin, albatta.  Shuning uchun men, bu kasbni mukammal egallashni niyat qilganlar uchun, mavzuga oid maqolalar seriyasini yozishga qaror qildim, keyingi maqolalarni o’tkarib yubormaslik uchun blog yangiliklariga obuna bo’ling!

Agar bu “yo’l”ni bosib o’tish oddiy va tez bo’ladi deb hisoblasangiz,afsuski, yanglishasiz. Web-dizaynerning ishi doimiy rivojlanish va yangi tendentsiyalarga asoslangan bo’ladi. Biroq, barcha professional qiyinchiliklariga qaramasdan, bu ishning eng yoqimli jihatlaridan biri bu yangi bilimlarga ega bo’la olish imkonidir.

Web-dizayner kim va uning vazifalari nimalardan iborat?

Web-dizayner bu, web-sahifa dizaynini yaratadigan va ularni veb-saytlarga birlashtiradigan, internet texnologiyalarini tushunadigan, badiiy did va bilimga ega bo’lgan shaxs. Web-dizaynerning asosiy vazifasi, Internet-loyihaga imkon qadar ko’proq foydalanuvchilarni qiziqtirishdir.

Web-dizaynerning ikkinchi asosiy vazifasi, internetning o’ziga xos xususiyatlarini hisobga olgan holda, loyihaning uslubiy dizaynini ishlab chiqish imkoniyatiga ega bo’lishdir. Boshqacha qilib aytganda, loyihani amalga oshirish uchun u, tarmoq tomonidan belgilangan standart talablarga javob berishi kerak, masalan: grafik elementlar (logotiplar, bannerlar, chizmalar va boshqalar) optimallashtirilishi kerak, rang va shriftni tanlashda, foydalanuvchi, loyihaning grafik ko’rinishini qog’ozda emas, balki monitorda ko’rishini inobatga olishi kerak.

Agar grafik-dizayner faqatgina rasmlar va videolar  bilan ishlaydigan mutaxassis bo’lsa, web-dizaynerning ishi keng qamrovli bo’ladi. Bularga:

1. Sayt dizayni
2. Server rejasini ishlab chiqish
3. Server rejasini bajarish uslubini yaratish
4. Hujjatlarni yuklash vaqtini, ma’lumotlar uzatish kanalining tarmoqli kengligini, hujjatning grafik fayllari hajmini, rang palitrasi sifatini hisobga olgan holda, monitor ekranida web-hujjatlarni qabul qilishni ta’minlash
5. Web-sahifalarni tartibga solish qoidalarini aniqlash, formatni, fonni, dizayn elementlarining soni va sifatini tanlash
6. Web-hujjatlarning uslubiy namunalarini yaratish
7. Internet tugun bilan ishlash
8. Dastur va sahifa kodini yozish
9. Gipermatnli hujjatlarni boshqarish
10. World Wide web(WWW) da firmaning axborot siyosatini olib borish)
11. Web-sahifalarni tayyorlash va tekshirish vositalarini o’rnatish
12. Interaktiv veb-ilovalarni yaratish
13. Web-hujjatni yangilash
14. Statistik ishlov berish uchun ilovalarni yaratish.

Notanish so’zlardan qo’rqib ketdingizmi? (((. Shoshilmang, maqola davomini o’qing, siz uchun yaxshi yengilliklar bor… 

Web-dizaynerlikni endi boshlayotganlar oldidagi talablar

Web-dizayner bo’lishni va birinchi web-saytni yaratishni xohlaydiganlar uchun «minimal talablar» juda oddiy. Agar papkalar, grafik matnli fayllar haqida tasavvuringiz bo’lsa, boshlashingiz mumkin.

Biroq, ishni boshlash oddiy tuyilsada, yaxshi sayt dizaynini yaratish haqiqiy san’atdir. O’rganishingiz kerak bo’lgan ko’plab ko’nikmalar mavjud. Rang nazariyasi, elementlarning grafik ierarxiyasi, shriftlar va saytning umumiy tashkiloti haqida ma’lumotga ega bo’lishingiz kerak bo’ladi. Adobe Fotoshop, Illustrator, Flash, Dreamweaver va Corel Draf kabi dasturlarda ishlashni ham bilishingiz kerak, barchasini emas albatta, o’z sohangizga keragini o’rganing.

Bundan tashqari, agar siz, web dizaynerlikni mukammal egallashni isatasangiz, siz asosiy kodlash tillarini, ya’ni HTML, CSS va JavaScriptlarni ham bilishingiz kerak. Lekin, bularni bilmasdan turib ham bu kasb orqali pul ishlashingiz mumkin. Yani siz, sayt dizaynini fotoshopda tayyorlab, PSD fayllarni buyurtmachiga berasiz, buyurtmachi esa, bu PSD fayllarni HTML, CSS kodlarga moslashtirish uchun boshqa mutaxasistga topshiradi. Bu holda sizning ish haqqingiz ham kamayadi.

Demoqchimanki, yaxshi daromad qilish uchun, web dizaynerlikni mukammal o’rgangan maqul. Faqat, fotoshopda yaxshi dizayn yaratib ham yaxshi daromad qilishingiz mumkin, lekin, html, css larni bilsangiz, undanda ishingiz go’zal bo’lishi aniq.

Ko’nikma va tajriba esa, zarurat bilan, tajriba oshgan sari kelaveradi. Agar siz maqolaning ushbu qismiga qadar o’qigan bo’lsangiz, men «web-dizaynning ajoyib dunyosiga xush kelibsiz, yangi boshlovchi» deb ishonch bilan aytishim mumkin. Maqolani o’qishda davom eting…

Dizaynerlik kasbining xususiyatlari.

Web-sahifa dizayni – grafik dizayn emas, lekin bir-biriga juda ham yaqin. Loyihaning kelajakdagi  muvaffaqiyati bevosita, web-dizaynerning ish jarayonida quyidagi vazifalarni hal qilishiga bog’liq:

• Sayt foydalanuvchilarning maqsad va vazifalarini aniqlash;
• Sayt tuzilishini loyihalash va rejalashtirish;
• Foydalanuvchi interfeysini ishlab chiqish;
• Navigatsiyani ishlab chiqish;
• Foydalanuvchining tizim bilan o’zaro aloqasini boshqarish;
• Sayt tarkibini tayyorlash va uning sifatini nazorat qilish.

Kasbninig kamchiliklari va afzalliklari.

Veb-dizaynerlik kasbi haqida bir oz tushunchaga ega bo’ldik, to’g’rimi? Keling endi, kamchiliklari va bu kasbni tanlagandan keyin nimalarga erishishimiz mumkinligi haqida gaplashsak, nima deysiz?

Demak, bu kasbning afzalliklari:

• Mehnat bozorida doimiy talab,
• Ish bir mamlakat chegarasi bilan chegaralanmaydi,
• Masofaviy ish imkoniyati,
• Kasbiy o’sishning keng imkoniyatlari,
• Pul xarajatlarisiz deyarli har qanday g’oyani amalga oshirishingiz mumkin,
• Munosib ish haqi.
• Maxsus kurslarga bormasdan kasbni mustaqil o’rganish imkoni. Hech qayerda o’qimasdan turib ham bu kasbni egallash mumkin, lekin…

MASLAHAT! Shu yerda bir kichik maslahat – har qanday kasbni ham, shu kasbda malum yutuqlarga erishgan mutaxasistdan o’rgangan maqul, aytishadiku, “ustoz ko’rmagan shogird har tomonga yo’rg’alar” deb. Ustoz bilan vaqtdan yutishingiz aniq, vaqt esa, eng qimmat narsa. Qayerda o’qish mumkinligi to’g’risida keyingi maqoladan o’qing!

Kamchiliklari:

• Buyurtmachi va ijrochining badiiy qarashlarining nomuvofiqligi. Yani, sizning tasavvuringizdagi dizayn buyurtmachi istak xohishiga to’g’ri kelmasligi mumkin. Agar, aniq bir kelishuvlar asosida ishni boshlamasangiz, kelishmovchiliklar kelib chiqishi mumkin.

MASLAHAT! Bunday kelishmovchiliklarga uchramaslik uchun, buyurtmachi bergan texnik topshiriqni (TT, TЗ- технические задание) diqqat bilan o’rganing. Tushunmagan joylaringiz bo’lsa, albatta, buyurtmachidan tushuntirib berishini so’rang.

Web-dizaynerlar qancha pul topishadi?

Internetdan bu to’g’rida malumot qidirganimda, quyidagi narxlarga ko’zim tushdi (maqola yozilayotgan paytdagi narxlar):

• Sayt dizayni – 210$;
• Bannerlarni yaratish – 30$;
• Logotip yaratish – 100$;
• Veb-saytni 0 dan yaratib berish – 460$;
• Internet magazin – 740$;
• Flash 160$.

Bu narxlar qanchalik to’g’ri? Shubhasiz, tajribasi 10 yilga yaqin mutaxasistlar, endi boshlayotganlarga nisbatan ancha ko’p haq olishadi. Yakka tartibda, uyda o’tirib, freelanser bo’lib ishlayotgan web dizaynerga nisbatan, o’z komandasiga ega bo’lgan dizaynerlik agenstva va kompaniyalar ancha qimmat turadi. Shulardan xulosa chiqargan holda o’z ishingizni baholashingiz mumkin.

Xulosa.

Yuqorida keltirilgan ta’riflarga asoslanib, web-dizaynerning rassom bo’lishi shart emasligini tushundingiz deb o’ylayman. Web-dizaynerning asosiy vazifasi, qulay, tushunarli va chiroyli sayt dizaynini (foydalanuvchi interfeysini) yaratishdir.

Web-dizaynerlarning juda original va badiiy bezatilgan saytlarini internetda ko’plab misollarlarda kuzatishimiz mumkin.

Har qanday narsaga (matbuot mahsulotlari, web-resurs dizayni elementlari, kompyuter o’yinlari elementlari va boshqalar) original tasvirlarni yaratadigan mutaxassislarni  web-dizaynerlar emas, balki illyustratorlar deb atashadi. Agar siz tayyor tasvirlarni sifatli qayta ishlashni o’rgansangiz-bu saytning dizayni uchun yetarli bo’ladi.

Bugun sizga web-dizayner kasbi bo’yicha bermoqchi bo’lgan ma’lumotlarim shulardan iborat edi. Keyingi maqolalarimda albatta ushbu kasb egalarini ish joylari va maoshlari haqida batafsil ma’lumot berib o’taman. Bu mavzuda fikr va mulohazalaringizni izohlarda kutaman. Albatta, maqolani ijtimoiy tarmoqdagi do’stlaringiz bilan o’rtoqlashing va keyingi maqolalardan bexabar qolmaslik uchun blog yangiliklariga obuna bo’ling!

Keyingi maqolada ko’rishguncha, azizlar!